”Богема” дуурь дахин амилна

"Богема" дуурь дахин амилна

48 минутын өмнө

Энэ сарын 31-нд УДБЭТ-ын тайзнаа Ж.Пуччинийн хөгжим, Л.Иллизи, Ж.Джакоза нарын цомнол "Богема" дуурь тавигдана. Анх 2004 оны тавдугаар сарын 07-нд ДБЭТ-ын тайзнаа амилсан энэхүү дуурийн удирдаачаар УГЗ Н.Туулайхүү, найруулагчаар Ерөнхийлөгчийн нэрэмжит шагналт СТА Г.Эрдэнэбаатар, зураачаар СТА Г.Ганбаатар нар ажиллажээ. Рудольфийн дүрд тенор хоолойт Б.Гомбо-Очир, Марселийн дүрд баритон хоолойт Э.Анхбаяр, Шонарын дүрд баритон хоолойт М.Амарсанаа, Коллений дүрд СТА О.Хүрэлбаатар нар тоглох аж. 1830-аад оны Парист үйл явдал нь өрнөх уг дуурийг анх 1896 оны хоёрдугаар сарын 01-нд Туриний театрт тоглож байсан түүхтэй.

Дуурийн тухай товч танилцуулахад анх 1896 оны хоёрдугаар сарын 01-нд Турин хотын "Реджо" театрт тоглож байжээ. 1849 онд А.Мюржегийн бичсэн "Богемачуудын амьдрал" хэмээх романаас сэдэвлэн 1849 онд Т.Барре тайзнаа жүжиг болгон Париж хотноо маш амжилттай тоглож байсан аж. Дараа нь энэ зохиолоор Ж.Пуччиний дуурь бичсэн байна. Ж.Пуччини энэ уран бүтээлээр өөртөө авьяас хэмээх асар их баялаг бүхий уран бүтээлч залуус мөнгөгүйгээс болж ямар өрөвдмөөр үл үзэгдэх зовлонг туулж байгааг харуулахыг зорьсон байдаг. Ж.Пуччинийн хувьд энэ бүхэн Миланы хөгжмийн дээд сургуульд сурч байх үеийнх нь хийгээд их авьяас билэгтэй хүмүүсийн хувь заяа хүн төрөлхтөнд агуу ихийг үлдээдэг боловч эмгэнэлтэй байдаг тухай хөгжмийн хэлээр яруу дүрсэлж чадсан юм. Уг романыг дуурь болгоход нилээд товчлох шаардлагатай байсан ба зохиолын утга санаа огт хөндөлгүй хадгалж үлджээ.  Эх сурвалж www.wikimon.mn