Цахилгааны төлбөрийг өндөр тарифаар авдаг гэжээ

Цахилгааны төлбөрийг өндөр тарифаар авдаг гэжээ

1 минутын өмнө

Хотын гэр хорооллын иргэдээс цахилгааны төлбөртэй холбоотой өргөдөл гомдлууд ихээр ирж буй тул ШӨХТГ-аас нөхцөл байдлыг судалжээ. Уг ажлын хүрээнд ШӨХТГ-ын дарга, албан хаагчид нийслэлийн гэр хорооллын хороодоор  явж иргэдтэй уулзалт хийхэд нэг хашаанд ах дүү хамаатан саднаараа гурваас таван айл амьдран суудаг бөгөөд хашааны эзэн айлын нэр дээр цахилгааны тоолуур байдаг аж. Иймд нэг хашаанд байдаг айлуудын цахилгааны төлбөр 150 квт-аас дээш гардаг, өдөр шөнийн тарифаар ялгаж боддоггүйгээс илүү төлбөр төлдөг, битүү хайрцаг дотор таваас зургаан айлын тоолуурыг түгждэгээс хяналт тавих боломжгүй зэрэг зөрчлүүд маш ихээр гардаг байна. 

Мөн дахин төлөвлөлтөд хамрагдсан айл өрхүүдийн хувьд уг төлөвлөлтөөс болж амьдрах орчин нөхцөлөө сайжруулж болохгүй нөхцөл байдал үүсээд байгаа тухай гомдлыг ихээр тавьсан юм. Учир нь дахин төлөвлөлтөд одоогоос хоёр жилийн өмнө орсон хэдий ч өнөөдрийг болтол байшингийн сууриа ч ухаагүй байгаа нь тэр бүсэд амьдран сууж буй айл өрхүүдэд тодорхойгүй байдал үүсэж, итгэл алдарч байгааг хэлж байлаа. Тийм учраас гэр хорооллын дахин төлөвлөлтийн үйл ажиллагааг шалгаж өгөхийг ШӨХТГ-аас хүсчээ.

Өөр нэг томоохон асуудал нь иргэдийн аюулгүй, тайван оршин суух нөхцөл байдалд аюул үүсгэх болсон эзэнгүй, тэнэмэл нохойг устгах, хог хаягдлыг тээвэрлэх үйл ажиллагаа болон зарим худаг усны эрүүл ахуйн асуудалд анхаарлаа хандуулж  шийдвэрлэж өгөхийг хүссэн өргөдөл гомдлыг ШӨХТГ-ын улсын байцаагч нарт өгчээ. Дээрх асуудлуудыг хянан шалгах, иргэдийн өргөдөл гомдлыг барагдуулах зорилгоор ШӨХТГ-ын дарга Т.Аюурсайхан гэр хорооллын цахилгаан төлбөр, дахин төлөвлөлт, хог хаягдлын менежментийн асуудлаар хяналт шалгалтын гурван ажлын хэсэг байгуулж ажилд нь оруулсан гэнэ. Эх сурвалж www.wikimon.mn

This entry passed through the Full-Text RSS service - if this is your content and you're reading it on someone else's site, please read the FAQ at fivefilters.org/content-only/faq.php#publishers.