Мөрөөдлийнхөө таавчгийг худалдан авчээ

Мөрөөдлийнхөө таавчгийг худалдан авчээ

1 минутын өмнө

Их Британийн Галифакст амьдардаг нэгэн тэтгэврийн хөгшин сугалаанд оролцоод 4,3 сая фунт стерлингийн хожил байгуулжээ. Тэрбээр нэн түрүүнд аль эртнээс мөрөөдөж байсан шинэ гэрийн шаахайгаа авсан гэнэ. Оёдолчин асан 69 настай Жэйн Льюис 1991 оноос хойш тогтмол оролцдог байсан UK Lotto сугалааны ялагч болжээ. Хожил байгуулсан эмгэн "Өглөө эртлэн гараад авобусанд сууж, хотын төвийг зорьсноор гэрийн шинэ шаахай авлаа. Аль эрт л тэдгээрийг нүдлэчихсэн байсан юм. Авахаар мөнгө цуглуулж байв. Одоо өөрийгөө эрхлүүлж болно гэж бодлоо" хэмээн өгүүлсэн аж.

Льюис эмгэн улмаар шинэ байшин худалдаж авна гэдгээ онцлов. Энэ эмэгтэй сүүлийн 11 жилийн хугацаанд нэг унтлагын өрөө, маш жижигхэн гал тогоо бүхий сууцыг түрээслэн амьдардаг байжээ. Шинэ сууцанд ороод тэрбээр боов, боорцог хийх мөрөөдлөө ажил хэрэг болгохоор шийдсэн байна. Нэмэлт унтлагын өрөөнүүд ойр дотны хүмүүсийг нь хааяа орогнуулах гэнэ шүү.

Тэтгэврийн хөгшин зарим мөнгөө 40 гаруй жилийн тэртээ өөд болсон нэгэн хүүгийнхээ шарил дээр чулуун хөшөө босгоход зориулах аж. Таван хүүхэд, 10 гаруй ач, зээтэй эмэгтэй тэднийгээ одоо мөнгөөр дутаахгүй гэдгээ ярьжээ. "Би одоо хүүхдүүдээ санхүүгийн хувьд хангалуун байлгаж чадна. Энэ нь надад маш чухал юм" хэмээн баяр баяслаа нууж үл чадсан Льюис эмгэн өгүүлсэн байна. Эх сурвалж www.wikimon.mn

This entry passed through the Full-Text RSS service - if this is your content and you're reading it on someone else's site, please read the FAQ at fivefilters.org/content-only/faq.php#publishers.