Л.Гансүх нар ерөнхий шүүгчид хандана

Л.Гансүх нар ерөнхий шүүгчид хандана

23 минутын өмнө

Шинэчлэлийн Засгийн газраас хэрэгжүүлсэн "Нүүрс" хөтөлбөрөөс их хэмжээний мөнгө завшсан гэх хэрэгт буруутгагдаад буй Л.Гансүх нарт холбогдох хэргийг өчигдөр Дээд шүүх хэлэлцэж, эцсийн шийдвэрээ гаргасан.

Таван цаг орчим завсарлаж, хэлэлцсэн шүүгчид Анхан болон давж заалдах шатны шүүхээс Л.Гансүхэд оноосон 4.6 жилийн ялыг 3.6 жил болгон бууруулж, жирийн дэглэмтэй хорих ангид ял эдлүүлэх шийдвэрийг гаргасан. Харин Б.Мөнгөнтуяад холбогдох хэргийг хэрэгсэхгүй болгож, цагаатгав. Түүнчлэн шүүгдэгч нарт ногдуулсан 2.5 тэрбум төгрөгийн хохирлыг 1.1 тэрбум төгрөг болгон бууруулж, Л.Гансүх, Н.Даваахүү нарыг хувь тэнцүүлэн төлүүлж "Багануур" ХК-д олгохоор шийдвэрлэв.

Дээд шүүхээс гаргасан энэхүү шийдвэрт шүүх хуралд оролцогсод сэтгэл хангалуун бус байгаагаа илэрхийлж, "Монгол Улсад шударга шүүх байхгүй болжээ, улс төрийн зорилгоор хэнийг, яаж ч яллаж болдог юм байна. Уг нь Дээд шүүхийг өмнөх шатны шүүхүүдийн гаргасан алдааг засч, хуульд нийцүүлсэн зөв шийдвэр гаргана байх хэмээн бодож байсан ч талаар боллоо" хэмээн бухимдаж байв. Хяналтын шатны шүүх хуралд УИХ-ын гишүүн Н.Алтанхуяг, Дархан-Уул аймгийн иргэд оролцсон юм.

Харин Л.Гансүхийн өмгөөлөгч Ц.Баасандорж "Л.Гансүх шүүх хуралдаанд биечлэн оролцох хүсэлт гаргасан. Эрүүгийн байцаан шийтгэх хуулийн 36 дугаар зүйлд заасны дагуу шүүгдэгч, ялтан хүн шүүх хуралдаанд биечлэн оролцох эрхтэй байдаг. Гэтэл Дээд шүүх биеэр оролцуулаагүй. Хэвлэл мэдээллийн байгууллагууд шүүх хурлыг шууд дамжуулах хүсэлт гаргасан ч татгалзсан. Өөрөөр хэлбэл, нээлттэй ил тод шүүх өнөөдөр алдагдлаа.

Энэ бол анхнаасаа улс төрийн захиалгатай байсан. Улс төрийн захиалгыг шүүх биелүүллээ гэж үзэж байна. Л.Гансүх гэдэг хүн хувьдаа нэг ч төгрөг аваагүй, гэмт хэрэг үйлдээгүй. Зөвхөн "Нүүрс" хөтөлбөрийг хэрэгжүүлснийхээ төлөө яллууллаа. Хоёр хуулийн этгээд гэрээний үнээ тохиролцсон байхад хөндлөнгөөс нөлөөлж хүн ялладаг жишгийг шүүх тогтоолоо. Гомдолтой байна. Бид Ерөнхий шүүгчид гомдол гаргана. Ерөнхий шүүгч гомдлыг үндэстэй гэж үзвэл Улсын Дээд шүүхийн нийт шүүгчдийн хуралдаанаар хэлэлцүүлнэ. Тэгэхээр 30 хоногийн дотор гомдол гаргах боломж байгаа" гэжээ. Эх сурвалж www.wikimon.mn

Let's block ads! (Why?)