Ч.Улаан, Д.Тэрбишдагва нарыг нэр дэвших эрхгүй гэлээ
39 минутын өмнө
Өнгөрсөн долоо хоногт УИХ-ын гишүүн Ч.Улаан, Д.Тэрбишдагва нар МАХН-ын гишүүнчлэлээс татгалзаж, УИХ дахь "Шударга ёс" эвслийн бүлгийг орхисон билээ. Тэгвэл МАХН-ын Хяналт, ёс зүйн хорооны дарга Г.Давааням өнөөдөр хэвлэлийн хурал хийж, УИХ-ын гишүүн Ч.Улаан, Д.Тэрбишдагва нарыг намаас нь хууль бусаар гарсан тул намын дүрмийн дагуу асуудлаа тавихыг шаардав.Тэд намаас татгалзах өргөдлөө МАХН-ын дарга Н.Энхбаярт хаягласан нь хууль бус үйлдэл бөгөөд намынх нь дүрмээр бол намаас гарах, намд элсэх хүн намын анхан шатны байгууллага болох үүрт хүсэлтээ гаргах ёстой аж. Тиймээс Ч.Улаан, Д.Тэрбишдагва нарыг харьяа намын үүртээ хүсэлтээ гаргаж, энэ сарын 20-ны үед хуралдах МАХН-ын бага чуулганаар асуудлаа шийдүүлэх ёстой гэв. Мөн тэрбээр МАХН-аас албан ёсоор гараагүй цагт Ч.Улаан, Д.Тэрбишдагва нар УИХ-д нэр дэвших боломжгүй гэдгийг хэлэв. Учир нь, Улс төрийн намын тухай хуульд Монгол Улсын иргэн нэг намын харьяалалтай байна гэсэн заалтыг ноцтойгоор зөрчиж буй гэнэ.
Мөн Ч.Улаан, Д.Тэрбишдагва нарыг МАХН-аас гарч буйтай холбогдуулан мэдэгдэл гаргасан байна. Тус мэдэгдэлд МАХН-ыг бүлэггүй болгож хүчгүйдүүлэх МАН-ын бүлгийн захиалгыг Ч.Улаан, Д.Тэрбишдагва нар биелүүлж, утсан хүүхэлдэй болсонд харамсаж буйг илэрхийлжээ.
2012 онд МАХН-д хэрэгтэй цагтаа ирж, нэр нүүр гуйж явсанд намын удирдлага, гишүүд итгэж, Ч.Улаанд УИХ-ын дэд дарга, Сангийн сайд, Төсвийн байнгын хорооны даргын өндөр албыг дөрвөн жил хашуулсан. Харин Д.Тэрбишдагва нь Шадар сайд, намын дэд даргаар цөөнгүй жил ажилласан. Гэтэл тэд өөрсдөө намаас гараад зогсохгүй бусад гишүүдэд ажил, албан тушаал амалж, ятгах, шахах зэргээр урвуулж, байна. Энэ байдлаа зогсоохгүй бол Улс төрийн намын тухай хуулийн дагуу хууль, хяналтын байгууллагад хандахаа мэдэгдэв.
Мөн мэдэгдэлд намын гишүүддээ хандан, жудаггүй хүмүүсийн элдэв уран үг, худал амлалт, мөрөөдлийн бялуунд хууртахгүй байж, намдаа үнэнч байхыг хүсэн, уриалсан байна.
Эх сурвалж www.wikimon.mn
0 comments:
Post a Comment