Г.Доржсамбуу агсныг дурсана

Г.Доржсамбуу агсныг дурсана

31 минутын өмнө

"Говийн зэрэглээ"-гийн Арслангийн дүрээр үзэгчдийн сэтгэл зүрхэнд хоногшин үлдсэн найруулагч Г.Доржсамбуу агсны нэрэмжит "Бурхан мэднэ" театр урлагийнхны наадам маргааш болно. Энэ наадмыг Г.Доржсамбуу агсныг дурсч төрсөн өдрөөр нь хийдэг уламжлалтай билээ. Энэ жил шилдэг найруулагч, эрэгтэй, эмэгтэй жүжигчин, зураач, жүжгийн зохиолч, хошин шогийн хамтлаг, театр урлагийн зүтгэлтэн зэрэг долоон номинацид шагнал гардуулах гэнэ. Энэ шагналыг одоогоор 18 уран бvтээлч хүртсэн аж. "Бурхан мэднэ" театр урлагийн наадамд 2003 оноос өнөөг хүртэл тайзнаа амилсан бvхий л жүжиг өрсөлдөх тул маш чадварлаг уран бүтээлчид, чанартай жүжгүүд шагнал авах биз ээ.
 
Г.Доржсамбуу агсны амьд ахуйдаа хүртсэн хамгийн том шагнал бол Э.Оюун багшийн магтаал байсан юм. Тайзнаа 10 жил тоглосон цорын ганц жүжиг бол түүний найруулсан "Найрын ширээний ууц" жүжиг билээ. Энэ жүжгийг жилд зуу гаруй удаа тоглоход үзэгчдийн нэг ч суудал хоосон байгаагүй гэдэг. Түүнийг 1994 онд өөд болоход Монголын урлагийн ертөнцөд ихээхэн орон зай хоосорсон юм. Тиймээс гэр бүлийнхэн нь түүнийг дурсч 1995 онд төрсөн өдрөөр нь "Дурлалын нууц" жүжиг тавьжээ. Тэр нь одоогийн "Бурхан мэднэ" наадам болон өргөжөөд байгаа билээ. Эх сурвалж www.wikimon.mn