Ардчилсан нам дотроо бужигнаж эхлэв

Ардчилсан нам дотроо бужигнаж эхлэв

22 минутын өмнө

- Ардчилсан намын Үндэсний зөвлөлдөх хорооны хурлыг дөрөвдүгээр сараас өмнө хийх шаардлага хүргүүлжээ -

УИХ-д олонхи болж, гүйцэтгэх засаглалыг тэргүүлэн ардчилсан Ерөнхийлөгчтэйгээ хамтран ажиллаж буй түүхэн цаг мөчдөө хариуцлагагүй алдааг ээлж дараалан хийж буй АН-ын удирдлагын үйл ажиллагааг жирийн гишүүд нь анхаарал тавин ажиглаж байгаа аж.

Тэдний үзэж байгаагаар "2011 онд явагдсан ротацийн сонгуулиас хойш Ардчилсан намд Үндэсний зөвлөлдөх хорооны сонгууль огт хийгдсэнгүй. Ингэснээр жил бүр явагдаж, жирийн гишүүдээсээ тасарсан албан тушаалтнууддаа хариуцлага тооцох боломж АН-д бүрэн устлаа.

Өнөөдөр ҮЗХ-ны 231 гишүүний 57 нь төрийн алба хаагч болсон байгаа нь тэдний нөхөн сонгуулийг яаралтай зарлах шаардлагыг төрүүлж байна. Түүнчлэн намын их хурлын эрх мэдлийг ҮЗХ руу шилжүүлсэн, ҮЗХ-ны эрх мэдлийг Гүйцэтгэх зөвлөл рүү шилжүүлсэн тогтоолоос болж АН-ыг 27-хон хүн шууд удирдан шийдвэр гаргаж байна. Намын их хурлаас томилогдох ёстой даргын сонгуулийг явуулалгүй хоёр жил боллоо. Төрийн алба хаагчдыг хоморголон халж, удирдах албан тушаалтны тоог гурав дахин нэмсэн Шинэчлэлийн Засгийн газрын алдаатай үйл ажиллагаанаас болж эдийн засгийн хурд саарч, нүүрсний салбарын экспорт бүрэн зогслоо. Монголбанкны удирдлага төгрөгийн худалдан авах чадварыг муутган ам.долларын ханшийг хяналтаас алдсан нь нэгэнт тодорхой болсон тул гишүүд, дэмжигчид бид АН-ын их хурал, ҮЗХ-ны хурлыг нэн яаралтай хийж, ажилдаа дүн тавих цаг иржээ. Хэрвээ АН-ын ҮЗХ-ны хурлыг дөрөвдүгээр сард багтаан хийхгүй бол Ялалтын талбайд АН-ын дүрмийн эх хувийг оршуулах ёслол зохион байгуулж, үүний дараа шат дараалсан арга хэмжээг авах болно.

Жич: АН-ын жигүүрийн 15 зохицуулагч улс төрийн болон төрийн албан тушаалд 2012-2016 оны бүрэн эрхийн хугацаанд огт очихгүй гэдгээ зарлаж байна. Төрийн яамны дэд сайдаас эхлээд улсын үйлдвэрийн дарга хүртэл янз бүрийн албан тушаалаар бидний намаа аврах, дүрмээ мөрдүүлэх гэсэн шаардлагыг дарж чадахгүй болно. АН-ын жигүүр дотоод эв нэгдлийг сахин өөр бусад асуудлыг сөхөхгүй, Засгийн газрыг огцруулах асуудлыг хөндөхгүй байгаа юм. АН дүрмээ мөрдөж эхлэх нь хамгийн гол зорилго билээ" гэсэн шаардлагыг намынхаа удирдлагуудад хүргүүлж байгаа аж.

Ямартай ч Ардчилсан нам дотоод ардчиллынхаа талаар тууштай арга хэмжээ авч эхлэхгүй бол улс төрийн бусад хүчнүүдийн адилаар дотооддоо хагаралдаж эхлэх бололтой. Эх сурвалж www.wikimon.mn