АН-ын нэр хүнд Дорнодод унажээ

АН-ын нэр хүнд Дорнодод унажээ

1 цаг 9 минутын өмнө

2012 оны сонгуулийн үр дүнд АН ах нам болох МАН-ыг арайхийж ялсан хэдий ч өнгөрсөн хоёр жилийн хугацаанд төвхнөөд нэгэн үзүүрт сэтгэлээр 2016 он руу зорьж буй юм болов уу гэтэл арай л биш ээ.

Ерөнхий сайд Н.Алтанхуягийг муу­лаад ч яахав, тэртэй тэргүй тэр­бээр өнгөрсөн хугацаанд хангалттай сайн муу хэлүүлж байгаа бол яг мөн чанартаа АН дотоод зөрчлөө тийм сайн дарж чадалгүй одоо хэр нь зарим аймгууд нь сандал, ширээний хэрүүлтэй сууж байна. Алс зүүн хязгаарт байдал хүндэрч, АН-ын даргын суудал, тамганы төлөө дайн эхэлжээ. Өнгөрсөн сон­гуулиар нам ялж, орон нутгийн сон­гуулиар харин МАН нь нэг, хоёр хүний зөрүүтэй олонхи болмогц айм­гийн даргын суудлын төлөө ширүүн тэмцэл өрнөж, ээлж ээлжээр бие биенээ шоронд хийж эхэлснээр айм­гийн даргын суудлын үнэ цэнэ тэнгэрт тулав. Анхлан намын даргын суудлыг Д.Цэрэнчимэг гэгч хүүхэн авсан гэх боловч хуучин намын партизануудтай таарамжгүй болмогц хотоос УИХ-ын гишүүн Р.Бурмааг авчран нам дотор ээлжит бус хурал хийлгэн намын дарга болгосон хэдий ч байдал дээрдсэнгүй, ориг тамгатай Д.Цэрэнчимэг нь бөөн хэрүүл үүсгэв.

Энэ хооронд ИТХ нь МАН-ны зарим гишүүдтэйгээ тохиролцоонд хүрч мэс заслын эмч С.Ганбатыг айм­гийн даргаар томилмогц, нам доторхи зөрчил намдсан хэдий боловч үндсэн тамгаа атгасан Д.Цэрэнчимэг хэл ам хийж, хотоос генсек Ц.Оюундарийг урьж "Энэ асуудлыг шийдэж өг. Намын дарга нь аймгийн дарга болох ёстой" гэсэн боловч аймгийн ИТХ гэж том этгээдийг давж чадаагүйгээс гадна Н.Алтанхуяг руу лобби дутжээ. Ингээд цаг хугацаа өнгөрч, галт тэрэг жигдрэн хөдлөж байтал намын гишүүд Чингэлтэй дүүргийн АН дарга байсан Д.Цэрэнчимэгээс намынхаа үндсэн тамга, сандал ширээнээс гадна өнгөрсөн сонгуулиудын санхүү­гийн тайлан болоод олон зүйлээ авч, аудит оруулахаар идэвхтэй тэмцэл өрнүүлэв. Энэ байдал МАН-д нь дэндүү ашигтай харагдаж, энэхүү хэ­рүүлийг алсаас ч олон хүмүүс өр­дөж байгаа сурагтай. Өнгөрсөн долоо хоногт намын байрны түлхүүр, сейфны түлхүүр, тамганы асуудлаар намын байранд суулт хийж, бүр дот­роо зөрчилдөөн үүсгэж цагдаа дуудан сүр дуулиан болж байхад намын дарга хэмээх Д.Цэрэнчимэг нь хотоор яах ч учраа олохгүй яваа сурагтай.

Дорнод аймгийн АН-ын сандал ширээний тэмцэл эцэстээ олны өмнө томоохон онигоо болж, энэ нам 2016 оны сонгуульд хэцүүхэн л орох юм байна гэсэн дүгнэлтэд хүрч байна. Харин 2016 оны УИХ-ын сонгуульд горилогчид мэр сэр тандалт судалгааг Дорнодоор аль хэдийнэ явуулаад эхэлжээ. УИХ-ын гишүүн М.Зоригт Сүхбаатар айм­гаас жийгдэж, эргээд Д.Одбаярт "луйвардуулж ялагдсан" шархаа нөхөхөөр Дорнодын хойд сумдаар явж байгаа бол Ч.Сайханбилэг сайд гэнэт Дорнодын Баянтүмэн сумын "Баясгалант хөдөлмөр" нэгдлийн дарга нарын нэг давхар дан ягаан байшинд төрснөө санан явж байгаа аж. Дээр нь ТӨХ-ны дарга Д.Цогтбаатарын нэр ч хаа нэг дурдагдаж, олон түмний дунд яриа хөөрөө таамаг төдий явж байна. Тэгвэл өнөө цагт яг Дорнодын Ардчиллыг хэн аврах вэ гэж мянга мянган энгийн гишүүд өөр хоорондоо ярилцаж буй сураг сонсвол ирэх сонгуульд УИХ-ын ги­шүүн Х.Болорчулууныг найз Я.Санжмятаваар нь дамжуулан гуйж байгаад намдаа элсүүлэн аймгийн АН-ын даргаар тохоон томилж, ирэх сонгуульд олигтойхон нуруутай шу­дарга нэр хүндтэй хүнтэй хөтлөл­цүүлэд тавьчихад бүрэн ялалтад хүрч мэднэ гэсэн таавар сонжоо гаргаж байгаа хүмүүс ч зөндөө байна даа. Гэхдээ хэрхэхийг тэнгэр л мэдэх хэрэг дээ.

Эх сурвалж: "Маш нууц" сонин Эх сурвалж www.wikimon.mn

У.Хүрлээ