"Нарантуул", "Барс" захуудын үйл ажиллагааг хэсэгчлэн зогсоов
1 цаг 1 минутын өмнө
"Нарантуул" болон "Барс" захуудын үйл ажиллагааг хэсэгчлэн зогсоох Улсын байцаагчийн дүгнэлт гарчээ. Эрүүл ахуй, ариун цэврийн шаардлага хангаагүй учраас энэ арга хэмжээг авч байгаа юм байна. Нийслэлийн мэргэжлийн хяналтын газрын Улсын байцаагчид нийтдээ долоон хүнсний худалдааны төвийн 980 гаруй лангуу түрээслэгч иргэдийг хамруулсан хяналт шалгалтыг хийжээ. 446 зөрчил илэрч, тодорхой эрх бүхий албан тушаалтанд 30 гаруй сая төгрөгний торгууль ногдуулсан аж. Монгол Улсад Хүнсний тухай хууль хүчин төгөлдөр мөрдөгдөж эхлээд нэг жил, долоон сар болж байгаа. Гэвч энэ хуулийн хэрэгжилт маш хангалтгүй байгааг энэ удаагийн шалгалт нотлон харуулав.Ялангуяа хаяг, шошгын шаардлага хангаагүй, хугацаа дууссан импортын бүтээгдэхүүн их хэмжээгээр худалдаалж байсныг илрүүлсэн байна. Мөн хүнсний худалдааны төвүүдийн "Бөөний хангамж" нэртэй чингэлгүүдийг бүрмөсөн үйлчилгээнээс хасна гэдгийг хэлж байгаа юм. Халаалтгүй, усан хангамжгүй, гэрэлтүүлэггүй газар хүнсний бүтээгдэхүүн их хэмжээгээр хадгалж байгаа нь хэт халж, хэт хөрөх зэргээр чанар, аюулгүйн үзүүлэлт амархан өөрчлөгддөг байна. Энэ ч үүднээс мэргэжлийн хяналтын Улсын байцаагчид "Нарантуул" болон "Барс" худалдааны төвүүдэд найман чиглэлийн шаардлага тавьжээ.
Шаардлага биеүүлтэл "Нарантуул" захын өргөтгөлийн хүнсний худалдаа болон, "Барс" худалдааны төвийн төмөр чингэлгийн хүнсний худалдааг түр зогсоосон байна. "Нарантуул" захын байрыг өнөөг хүртэл Улсын комисс хүлээж аваагүй гэдгийг мэргэжлийн хяналтын байцаагчид хэлж байв. Энэ удаад гарсан зөрчлийг бүрэн арилгатал үйл ажиллагаа явуулах зөвшөөрөл олгохгүй гэдгийг хатуу анхааруулсан юм. Эх сурвалж www.wikimon.mn
0 comments:
Post a Comment