Оюутолгойн ТЭЗҮ-ийг энэ сард Эрдэс баялгийн зөвлөл хэлэлцэнэ

Оюутолгойн ТЭЗҮ-ийг энэ сард Эрдэс баялгийн зөвлөл хэлэлцэнэ

1 цаг 0 минутын өмнө

- Гадны хөрөнгө оруулагч нар Оюутолгой төслийг хүлээж байна -

Оюутолгой төсөл зогсонги байдалд орсноос үүдэж эдийн засагт олон сөрөг үр дагавар гарч байгааг эдийн засагчид болон уул уурхайн салбарынхан онцолж буй. Тэгвэл Уул уурхайн яамнаас өгч байгаа мэдээллээр төслийн хэлэлцээр амжилттай болж, энэ сардаа ТЭЗҮ-ийг хэлэлцэх байх гэсэн таамаглал гарчээ. Өнгөрөгч сард Оюутолгойн татварын асуудал болон төслийн талаар ТУЗ, Засгийн газар хоорондын хэлэлцээр болсон юм. Асуудал үндсэндээ шийдэгдсэн гэх мэдээлэл гарч, энэ дагуу Оюутолгойн хувьцааны ханш 5.77-6.27 ам.доллар хүртлээ өсч, өсөлт харагдаж эхэлжээ. Оюутолгой төслийн ТЭЗҮ-г өнгөрөгч зургаадугаар сард Эрдэс баялгийн зөвлөлөөр хэлэлцэх байсан ч одоог хүртэл хэлэлцээгүй. Тэгвэл энэ сард хэлэлцэх байх гэсэн таамгийг Уул уурхайн сайд хэлж байна. Түүний хэлж байгаагаар нөөцөө өгсөн, асуудал одоо хурдан шийдэгдэх гэнэ.

Олон улсын хөрөнгө оруулагчдын хувьд ч Оюутолгой төслийг харсан, хүлээсэн байдалтай байгаа гэх мэдээллүүд гарч байгаа. Энэ төсөл амжилттай үргэлжилвэл түр сул зогсоосон 3000 хүн ажилдаа орж, 1500 орчим туслан гүйцэтгэгч компаниуд хэвийн ажиллаж, түүнийг дагасан ажлын байр ч нэмэгдэнэ гэх мэтээр эдийн засгийн олон үр өгөөж, нөлөөлөл уул уурхайн салбарт бий болно гэдгийг эдийн засагчид олж харсан байгаа бол харин нөгөө талд Монголыг улам өрд оруулаад дуусна гэсэн шүүмж ч яригдаж байгаа юм. Ямартай ч Оюутолгойн гэрээг 2009 онд үзэглэж, түүнээс хойш монголчуудын хүлээж байсан шиг ашиг орлого, нөлөөлөл МУ-ын эдийн засагт харагдаагүй. Үүнээс хойш Оюутолгой төсөл амжилттай ажиллавал 2020 он гэхэд МУ-ын эдийн засгийг 35 хувиар өсгөж, зөвхөн эдийн засагт үзүүлэх шууд нөлөөлөл нь дангаараа улсын эдийн засгаас хоёр дахин их хэмжээтэй байх, айл өрхийн дундаж орлого 1,7 сая төгрөг буюу 1000 ам.доллараар өсөх төлөв ажиглагдаж байгааг эдийн засагчид судлан гаргажээ.

Одоо харин Засгийн газар, "Рио Тинто" хоёр хоорондоо хэрхэн тохиролцох, төсөл хэрхэн үргэлжлэхийг л харах үлдэж байх шиг. Эх сурвалж www.wikimon.mn