Орчуулгын уралдааны ялагчид шагналаа гардаж авлаа

Орчуулгын уралдааны ялагчид шагналаа гардаж авлаа

20 минутын өмнө

Монголын Орчуулагчдын Эвлэлээс гурав дахь жилдээ зохион байгуулж буй "Дэлхийн сонгодог богино өгүүллэгийн орчуулгын уралдаан"-ы дүн гарч, шалгарсан бүтээлийн эздийг шагнаж урамшуулах ёслолын ажиллагаа "Аз хур" номын их дэлгүүрт болж өндөрлөлөө. Энэ жилийн шалгаруулалтад 33 орчуулагчийн 50 гаруй өгүүллэг ирснээс 29 бүтээл шигшигдэж "Сонгодог өгүүллэгийн дээжис 3" номонд багтжээ.

Уралдаанд бүтээлээ сойсон орчуулагчдын хувьд англи, франц, герман, япон, солонгос, хятад, орос, түрэг, польш зэрэг хэл дээрх өгүүллэгүүдийг эх хэл рүүгээ хөрвүүлсэн байна.

Оролцсон бүтээлээрээ байр эзэлсэн орчуулагчдад шагнал гардуулж, баяр хүргэхээр Монгол Улсын Соёлын гавьяат зүтгэлтэн, нэрт дуун хөрвүүлэгч, өдгөө 88 насыг зооглож буй Ж.Гэндэндарам гуай, МУСГЗ, Дуун хөрвүүлэгч цолтой Ж.Нэргүй гуай иржээ. Харин уг уралдааныг санаачлагч МОЭ-ийн ерөнхийлөгч О.Чинбаярын хувьд ОХУ-ын Москва хотод докторантурт суралцаж байгаа хэдий ч орчуулгыг шүүх бүрэлдэхүүнд багтаж, санаа оноогоо хуваалцаж байсан юм.
Өөрсдийн залгамж халаа болсон залуу үеийнхэндээ зориулж Ж.Нэргүй гуай "Эх хэлээ сайн сурч, судлаад мөсөн дээр биш тосон дээр гулгаж буй мэт уран яруу хэллэгтэй орчуулга хийдэг болоорой" хэмээн захисан юм.

Шагналтнуудын тухайд Тусгай байрт Оросын их зохиолч Александр Иванович Куприны "Ариун хайр" өгүүллэгийн орчуулгаар Ч.Будьханд, Туркийн зохиолч Өмэр Сэефэттины "Өртөг" өгүүллэгийн орчуулгаар Т.Загарпэрэнлэй, Тусгай байрт Солонгосын зохиолч И Ги-Ёны "Ядуус" өгүүллэгийн орчуулгаар М.Амартайван нар шалгарчээ.

Харин Гутгаар байрт Америкийн зохиолч Эдгар Аллан Погийн  "Үнэнийг өчих зүрх" өгүүллэгийн орчуулгаар Б.Урангуа, Дэд байрт Америкийн зохиолч эмэгтэй Кэйт Шопены "Аадар" өгүүллэгийн орчуулгаар Г.Сугиррагчаа нар шалгарсан бол уралдааны Тэргүүн байрын шагналыг Японы зохиолч Ясүнари Кавабатагийн "Изүгийн бүжигчин охин" өгүүллэгийн орчуулгаар О.Намуун хүртжээ.

Ийнхүү шагнал гардуулах ёслолтой хамт уралдаанд ирсэн бүтээлүүдээс шигшиж багтаасан "Сонгодог өгүүллэгийн дээжис 3" номын нээлт болж, бүтээл нь номонд багтсан оролцогчдод дээжээс нь бэлэглэсэн юм.


Эх сурвалж www.wikimon.mn

This entry passed through the Full-Text RSS service - if this is your content and you're reading it on someone else's site, please read the FAQ at fivefilters.org/content-only/faq.php#publishers.